الشخرمه

العواف عليكم

احييكم من عالكرسي بتاعي امام مكتبي وجهاذ القمبيوطر في اقصي الركن الايسر لغرفتي

انا جايبلكم موضوع كنت كاتبه من ايام امتحاناتي زماااااااااااااااااااااااااااااااااان...........الله لا يعودها ايام كانت ايام مايعلم بيها الاربنا كان الواحد ...احم احم انا اسف خرجت بره موضوعنا

احنا كنا بنتكلم في ايه
اه

الموضوع اهو

المشهد الاول

من اسبوعين

قالولي الامتحان اختيار من متعدد وكلينيكال بحاله واحده قولتلهم اسئله الاختيار هتبقي في مواضيع ايه وكم واحده قالولي10 جمل في الباطنه كلها قلتلهم يعني اراجع واذاكر حوالي عشر كتب علشان عشر جمل قالولي مانت كده كده هتزاكرهم قولتلهم بس المفروض اني ازاكرهم علي شهر اكتوبر مش دلوقتي كلهم قالولي هو كده قولت الله يخربيتكم ولنا الله طب والامتحان امتي قالولي هنقلك قبلها بيومين مقولتش حاجه....اتشليت

المشهد الثاني
خلال الاسبوعين

نهار مايعلم بيه الا ربنا وليل كله كوابيس مش لحاجه والله بس عشان الظلم اللي احنا عايشين فيه يا جدعان والله حرام مش عارف ازاكر الكتب والا اجيب اوراق امتحانات والا اراجع ورق المحاضرات والا ايه ومستني الامتحان بين لحظه والتانيه طب حد يقولي اعمل ايه

المشهد التالت

يوم الامتحان

صحينا الفجر وصلينا الفجر وقعدنا نراجع الحاجات اللي محدش عارف هيه بتاعت ايه اساسا الله العظيم كنت برمي الكتاب علي المكتب والصفحه اللي تتفتح اقري فيهاوالمهم نزلنا وروحنا الامتحان اللي احنا عرفنا معاده طبعا قبلها بتلات ايام كان المعاد الساعه 8 واول دكتور شوفناه كانت الساعه 10.5استلمنا الورقه واقسم بالله ولا جمله مفهومه وجملتين من العشره في حاجه ماتشرحتش وجملتين مش في اي كتاب في التاريخ و3 جمل فيهم لف ولا لفه اللي جاب الديب من ديله والتلاته اللي معقولين تقريبا غلط من تعب الاعصاب الي شوفناه خرجنا من الامتحان والله وحده اعلم بما في الجب من وحوش قولنا ربنا يعوض في الكلينيكال استعدينا للكلينيكال واول ما دخلنا القسم نادوا علي اربعه من اولاد الاعلام في البلد ودكاتره الكليه ولم يغيبوا في الامتحان اكثر من 3 دقائق للتعارف وسلملي علي بابا دخلت وقولت ماليش دعوه دخلت علي حاله وكان الحوار كالاتي

اولا.: هي امراه عندها بتاع 100 سنه قعدت جنبها وصعبانه عليه والمصحف اني امتحن عليها

انا: اسمك ايه يا حاجه؟

هي : بتقول ايه؟

انا: بلغه الاشاره انتي منين.....فهمت انها مش بتسمع يا معلم >هتناقش مع واحده مش بتسمع< قشطه عليك يا كبير

هي: اسمي جمال

انا: اسمك ايه ؟

هي: بتقول ايه؟

انا:يوووووووووه

انا: بتشتكي من ايه؟

هي: من المنشيه

انا: ياستي بتشتكي من ايه؟

هي : من شارع حسن

انا : حسن ايه؟

هي : الدور التاني

انا: لولا اني مؤمن كنت قولت دي مخاويه وبتكلم اللهم احفظنا..........

..ياستي طب انتي عندك كم عيل؟

هي : عندي املاح علي صدري

والله العظيم ده الحوار اللي حصل بالظبط

قولت اكشف عليها وخلاص واشوف اليوم الي ما يعلم بيه الا ربناالمهم اني لقيت حاجات في القلب والكبد والطحال والرئه وكله من كده يا معلم زهقت..........قعدت جنب الحاجه لغايه مالدكتور جه قعد يسالني شويه واتكلمت معاه قالي افحصلي الكبدفحصته بطريقه العالم كله بيشتغل بيها وقسم الكبد والجهاز الهضمي هم اللي قايلين لينا عليها ولمن يدرس الطب هي تسمي ordinary method

الباشا قالي كده غلط وافحصه بالطريقه الفلانيه اللي هيه اساسا لا تنفذ الا في حاله واحدهbimanual method

بعد كده قالي اسمعلي القلب جيت اسمعه الباشا قالي روح يا معلم وبالشفا

حد يا جدعان لسه مش عارف يعني الشخرمه؟؟؟؟؟؟؟؟؟؟؟؟؟؟؟

الساعه دخلت علي واحده وعشره

تصبحوا علي خير